Дваесет и шест граѓански организации, иницијативи и платформи испратија јасно барање до Владата: итно да ги поништи одлуките и јавните повици за нови концесии за геолошки истражувања на металични минерални суровини во источна Македонија. Со едноставни зборови – луѓето што со години живеат на тоа тло не сакаат нови рудници таму.

Барањето се однесува на одлуки донесени во декември минатата година и во јуни годинава, за просторите „Север-Североисток“ и „Исток“, како и за јавниот повик од февруари. Меѓу организациите се и Метаморфозис, Еко свест, Зелен Хуман Град, О2 Иницијатива и Зелена котлина – организации кои со години се борат токму против отворање нови рудници. Тие бараат Владата и Министерството за енергетика веднаш да ги запрат сите постапки, вклучувајќи ја и електронската аукција закажана за 6 август.

Бројки што кажуваат сè

Според анализата на организациите, ситуацијата на исток веќе е драматична. Од 2004 година наваму, со различни видови концесии биле опфатени околу 100 проценти од териториите на Пробиштип, Делчево и Карбинци. Кај Пехчево бројката е 97 проценти, кај Чешиново-Облешево 94, кај Кратово 89, кај Зрновци и Виница 87, кај Радовиш 86, кај Берово 85. Со други зборови – цели општини се веќе прекроени во концесиски полигони, а сега доаѓаат нови.

Организациите тврдат дека новите одлуки се преклопуваат со веќе истражени простори и постојни концесии, што според нив го крши членот 7-а од Законот за минерални суровини – кој забранува проспекциски истражувања на веќе истражени или доделени простори. Тие велат дека Министерството било должно однапред да ги исклучи законски забранетите површини, а не да ги вклучи па подоцна да „поправа“.

Поради истекот на роковите, тие бараат Владата во рок од три работни дена писмено да ги извести за преземените дејствија. Прашањето што виси над источна Македонија е поголемо од една аукција: кога 29 општини веќе се измерени, избушени и распределени, што останува да им се остави на луѓето што таму живеат – освен барањето, повторно, некој конечно да ги слушне?