Јавното претпријатие што ги наплаќа паркинзите во центарот на Скопје, се покажува, е одличен во собирањето пари од граѓаните – но не толку добро во плаќањето на своите обврски. Државниот завод за ревизија утврди дека ЈП „Паркинзи на Општина Центар“ не уплатило 86,4 милиони денари, односно околу 1,4 милиони евра комунална такса во буџетот на самата Општина Центар.

Ревизијата за 2024 година изрази неповолно мислење за реалноста на финансиските извештаи и мислење со резерва за усогласеноста со законот. Најголемиот дел од неплатената такса – над 79 милиони денари – се однесува на периодот од 2019 до 2023 година. Значи, не станува збор за случајно доцнење, туку за долг што се таложел со години.

Список на пропусти што не завршува тука

Ревизорите наброија цела низа слабости. Претпријатието неправилно ја евидентирало опремата – паркомати, монтажни конструкции, киоск-системи – без пресметана амортизација. Има искажано побарувања од над 80 милиони денари, од кои една четвртина се постари од шест години и за нив не се преземени навремени активности за наплата. Не е извршен целосен попис, утврдено е несогласување во благајната, а трговските книги не се заклучени, што овозможува ретроактивни промени.

Тука е иронијата што секој Скопјанец ќе ја препознае. Претпријатие чија цел е да наплатува – да казнува кога ќе задоцниш минута со паркинг билетот – самото натрупало долг од милиони и застарени побарувања за кои не мрднало прст. Кога граѓанинот не плати, следи опомена и извршител. Кога претпријатието не плати во сопствената општина, следи ревизорски извештај што малкумина ќе го прочитаат.

Утврдени се и слабости во јавните набавки – несразмерни услови за учество, прифатени понуди над проценетата вредност, ненавремени известувања. Прашањето „кој ќе одговара“ звучи речиси наивно во контекст на едно општинско претпријатие. Но токму затоа што е локално и „мало“, вреди да се праша: ако тие што наплаќаат од нас не ги плаќаат своите обврски, зошто да веруваме дека парите од паркингот одат таму каде што треба?