Во Општина Сарај почна проект вреден повеќе од шест милиони евра – уредување на коритото на Сува Река, чија цел е трајно да се реши проблемот со поплавите што со децении им го трујат животот на жителите покрај реката. Премиерот Христијан Мицкоски лично изврши увид во почетокот на работите.

Проектот се финансира преку Министерството за животна средина и просторно планирање и опфаќа уредување на речното корито во должина од 12 километри, од селото Бојане до Глумово, каде Сува Река се влева во Треска. Реализацијата ќе оди по фази и треба да заврши во 2029 година. Градоначалникот на Сарај, Илијас Весели, го оцени како една од најголемите инвестиции што општината некогаш ги добила.

„Со години жителите живееја во страв од поплави, а денес тоа поглавје почнува да се затвора“, изјави Весели, додавајќи дека градежните работи официјално започнале на 7 јули. Мицкоски, пак, порача дека Владата останува посветена на исполнување на преземените обврски и дека „проблемите што се таложеле со децении не можат да се решат преку ноќ“.

И тука е делот што бара мирна глава. Уредување на речно корито за да не се плават куќи е точно она што државата треба да го прави – тоа не е фаворче, туку основна работа. Ако проектот навистина заврши и навистина ги заштити тие села, тоа е добра вест и заслужува да се каже така.

Но „со децении“ е зборот што повторно се провлекува. Ако поплавите се повторуваат со децении, тогаш почетокот на работите во 2026 не е триумф – тоа е задоцнет одговор на проблем што одамна требаше да биде решен. Ветувањата за 2029 се лесни денес. Вистинскиот тест ќе биде дали за три години ќе има завршено корито – или уште една пресечена лента по која водата повторно ќе тече каде што сака. Жителите на Сарај дотогаш ќе внимаваат на небото.