Жичницата на Водно е затворена четири месеци. Летото помина. Цената на санацијата во меѓувреме порасна од 20 на 45 милиони денари. Договор за санација сè уште не е потпишан.

Тоа се четири реченици од кои секоја е точна, и заедно опишуваат како во Скопје се поправа нешто што било расипано многу пред да се расипе.

Бројката се удвои пред работата да почне

Советот на Град Скопје на последната седница одобри зголемување на субвенциите за Јавното сообраќајно претпријатие за санирање на дефектот – 45 милиони денари, односно околу 730 илјади евра. Првично беа предвидени 20 милиони. Дополнителните 25 милиони денари се обезбедени со ребалансот на Буџетот за 2026 година и со измените на сообраќајната програма на градот.

Од Град Скопје појаснуваат дека дополнителното финансирање е насочено кон реконструкција, унапредување на техничката и функционалната состојба и зголемување на нивото на безбедност при користењето.

Забележете го редоследот. Прво е обезбедена сумата, потоа се очекува да се избере изведувач. Постапката за избор на економски оператор согласно Законот за јавни набавки е во тек преку ЈСП, кое стопанисува со жичницата, а од градот велат дека се очекува да биде финализирана во наредниот период.

Со други зборови: буџетот е удвоен пред да постои понуда што би го оправдала удвојувањето.

Што открила австриската фирма

Австриската компанија „Допелмаер“ утврдила дека целосен сервис на жичницата никогаш не бил направен и дека постоела опасност од откачување на гондола. Тоа е реченицата околу која се врти целиот случај.

Не станува збор за дефект што се случил во април. Станува збор за дефект што бил откриен во април, откако системот работел години без целосен сервис – превезувајќи луѓе над Скопје, во гондоли кои во одреден период биле затворани поради ветер и редовен технички сервис, што значи дека некој техничар редовно ги гледал.

Од Град Скопје и самите го признаваат тоа: „Станува збор за сериозен зафат, кој е резултат на долгогодишна негрижа и бара темелен и одговорен пристап.“

Кој е тој што не се грижел

„Долгогодишна негрижа“ е формулација без субјект. Нема име, нема функција, нема период. Жичницата е градски објект под управа на ЈСП, а ЈСП е под Град Скопје – па „негрижата“ има точна адреса и точен список на луѓе кои во тие години потпишувале или не потпишувале договор за сервис.

Досега никој не побарал тој список. Прашањето колку години не бил направен целосен сервис и кој бил задолжен за него во тие години не е поставено ниту еднаш јавно.

Уште на крајот на април беше кажано дека „Допелмаер“ ќе ја врши санацијата. До денес договор нема. Има само поголема бројка и постапка што „се очекува да биде финализирана“.