Платформата „Разговори за иднината во 12:05“ ги достави своите предлози за промени во СДСМ во партиската архива на „Бихаќка“. Документот го однесоа Игор Ивановски, Славјанка Петровска и Коста Начевски. Барањата, според содржината што излезе во јавноста: оставка од претседателот Венко Филипче, нов конгрес, ново раководство и нов идентитет на партијата.

„На хистеријата одговараме со предлози, на инертноста со конкретна акција, на безидејноста со прецизен план“, напишаа од Платформата, барајќи „во разумен рок“ партијата да ѝ се врати на членството.

Одговорот од раководството стигна експресно и без ракавици. Од СДСМ Платформата ја нарекоа „ЗНАМ 2.0“ – проект за разбивање на опозицијата по примерот на партијата ЗНАМ. Документот бил означен како доверлив, но, велат, содржината веднаш се појавила во медиумите блиски до власта. Според раководството, во него нема антикорупциски мерки, рокови за ЕУ-интеграциите ниту поддршка за Европското обвинителство – само оставка, конгрес и ново лого.

„Партијата не е на продажба и СДСМ не се предава на аванс. За нас СДСМ не вреди 1,6 милиони евра“, порачаа од партијата. Нивниот главен аргумент е аритметика: 17 потписници наспроти над 18.000 членови кои гласале за Филипче.

Препукувањето не застана на писмата. Филипче јавно ја прозва Славјанка Петровска, една од потписничките, обвинувајќи ја за спорна набавка на тенкови во вредност од околу 37 милиони евра. Од владеачката ВМРО-ДПМНЕ веднаш го повикаа, ако има докази, да ги однесе во обвинителството.

Тука е најголемиот проблем на целата приказна. Ако обвинувањето за тенковите стои, зошто излегува дури сега, во партиска кавга, а не порано, пред обвинител? Ако не стои, зошто се фрла? Најголемата опозициска партија треба да ја држи власта на отчет. Наместо тоа, ѝ нуди материјал – а власта може само да гледа како СДСМ сама си ги брои потписниците.