Десет загинати, над сто ранети – и обете страни од војната веднаш почнаа да ја раскажуваат својата верзија на истиот удар. Рускиот удар кај Киев погоди објект каде што, според украински извори, се одржувала изложба и демонстрација на беспилотни летала, украински и странски системи. Москва тврди дека токму тоа бил легитимен воен погодок. Киев зборува за масакр.

Руското министерство за одбрана соопшти дека нивните сили извеле „групен удар со високопрецизно оружје со долг дострел” врз објект во близина на Киев, каде што се демонстрирале напредни дронови „од украинско и странско потекло, користени за напади врз цивилни цели во Русија”. Со тоа Москва однапред ја упакува мета како воена, а не како било што друго.

Портпаролот на украинската војска Јуриј Игнат потврди два удара врз полигон во Киевската област за време на изложбата на дронови. Украинското обвинителство документира десет загинати и над сто повредени. Меѓу присутните во моментот на ударот, според украински извори, имало производители на дронови, претставници на командата за беспилотни системи и припадници на украинските служби.

Локални медиуми пренесоа експлозии низ Киевската област, со информации дека мета била асоцијацијата на производители на беспилотни системи „Армада”. Планираната изложба требала да прикаже беспилотни летала, опрема за детекција, радарски системи и капацитети за електронско војување – односно точно она што ја одржува украинската војска в живот трета година по ред.

И тука е целата вистина за оваа војна во една слика: индустрија за дронови станала фронт, а изложбениот саем – мета. Секоја страна има свое обвинителство, свое соопштение, своја бројка. А десетте мртви се вбројуваат во статистика што одамна престана да го трогнува светот. Балканот ја знае оваа сцена напамет – кога бројот на жртви станува аргумент во расправа, а не причина некој да застане.