Поликлиниката „Идадија” во Скопје конечно влезе во градежни скели. Започна реконструкција вредна над 31 милион денари, со која објектот што стои од 1975 година треба да добие нова фасада, изолација, современ систем за греење и енергетски ефикасно осветлување. Повеќе од четири децении оваа установа функционираше со дотраена инфраструктура – а низ неа секој ден минуваат илјадници пациенти.

Проектот се реализира преку Проектот за енергетска ефикасност во јавниот сектор, што го спроведува единица при Министерството за финансии, во соработка со Светската банка и Инвестициската рамка за Западен Балкан. Договорот за грант е потпишан во декември 2025 година, а по спроведена јавна набавка, во март оваа година е склучен договор со изведувачот во вредност од 31.028.850 денари.

Со реконструкцијата се очекува значително намалување на потрошувачката на струја и топлинска енергија, пониски трошоци за одржување и подобри услови и за медицинскиот персонал и за пациентите. На хартија – сè како што треба. Инвестиција во јавно здравство, финансирана со меѓународни средства, наместо да се остави зградата да пропаѓа.

Останува само она што кај нас секогаш е најтешкиот дел – роковите и квалитетот на изведбата. Договорот е потпишан, скелите се кренати, парите се обезбедени. Дали „Идадија” ќе биде обновена во разумен рок или ќе се приклучи на списокот проекти што со години висат под најлон – тоа ќе го покаже не соопштението, туку датумот кога првиот пациент ќе влезе во обновена чекалница.