Основниот суд во Улцињ ѝ одреди 30-дневен притвор на 46-годишна македонска државјанка, осомничена за кривично дело убивање и мачење животни и уништување на нивното живеалиште. По црногорскиот Кривичен законик, за тоа дело е предвидена парична казна или затвор до две години.

Според црногорската полиција, на 24 јули таа со автомобил „Мерцедес” намерно прегазила куче од расата шарпланинец, а потоа се обидела да ја напушти државата. Била запрена на граничниот премин Сукобин – Муриќани и приведена.

Одбраната кажува сосема друга приказна. Според неа, истиот тој шарпланинец претходно влегол во нивниот стан, го усмртил нивното куче од расата шицу и потоа ги нападнал неа и нејзиниот малолетен брат, поради што возилото било употребено за да го оттурне животното, а не за да го убие. Работникот во хотелот, според семејството, помогнал повреденото милениче да се однесе кај ветеринар, но тоа не преживеало.

Тука започнува вториот дел од случајот – оној што нема врска со судот. Снимка од настанот заврши на социјалните мрежи и толпата пресуди пред обвинителот да заврши со собирањето докази. Повици за лична одмазда, идентификација, споделување на податоци. За неколку часа целата држава знаеше како се вика жената.

Дека некој сака да ги заштити животните е добра работа. Дека истата толпа која бара казна за мачење животно организира лов врз човек чија верзија на настанот сè уште не е испитана – тоа е нешто друго. Обвинителството допрва треба да ги собере видеоснимките, исказите и вештачењата.

Црна Гора не ги сфаќа лесно овие дела и тоа е за поздравување – законот таму постои и се применува. Прашањето е дали пресудата ќе биде донесена во судница или веќе е донесена на екраните. Затоа што ако секој случај се решава прво на интернет, тогаш судот станува формалност, а тоа е скапа навика за секоја држава на Балканот.