Оние безбројни „лајкни, тагирај тројца пријатели и сподели за да освоиш” наградни игри на социјалните мрежи конечно добиваат правила. Со новиот Закон за игри на среќа, кој стапува на сила на 14 јули, за првпат во Македонија се воведува регулирана рамка за таканаречените giveaway кампањи – дозвола, надоместок и јасно утврдени услови.

Правилата се конкретни. Секој што сака да организира наградна игра мора да поднесе барање до Министерството за финансии најмалку 30 дена пред стартот, со приложени правила на играта, доказ за потеклото на наградите, регистрација и уплата на административен надоместок од 100 евра. По одобрувањето, организаторот плаќа и 18 отсто од вкупната вредност на наградниот фонд, и тоа во рок од три дена – инаку дозволата се одзема.

Транспарентноста е втората страна на приказната. Правилата на играта мора јавно да се објават пред почетокот, добитниците да се објават во рок од три дена по извлекувањето, а наградите да се доделат најдоцна во рок од 60 дена. Со други зборови, крајот на времето кога некој ќе распише „наградна игра”, ќе собере десетици илјади следбеници, а потоа наградата мистериозно ќе заврши кај „пријателка на организаторот”.

Дали ова е разумна регулатива или уште еден слој бирократија што ќе ги оптовари малите бизниси – зависи од тоа од која страна гледаш. За потрошувачот што учествувал во десетина „наместени” наградни игри, правилата се добредојдени. За малата фирма што сакала едноставно да подари неколку производи за реклама, 100 евра плус 18 отсто и цел месец чекање можат да звучат како казна за добра волја. Како и обично, ѓаволот ќе биде во спроведувањето.