На 1 октомври навечер, на Исакиевскиот плоштад број 3, во самиот центар на Санкт Петербург, избувна пожар. Пријавата до руското Министерство за вонредни ситуации стигна во 20.11 часот по московско време. Огнот за кратко време го зафати историското здание, се прошири на околу 2.000 квадратни метри, а дел од покривот се урна.

Зградата е позната како Милеровата палата. Нејзината основа потекнува од втората половина на 18 век, а сегашниот изглед го доби во 1879 и 1880 година, по проект на архитектот Фердинанд Милер. Еклектичен стил, сочувани историски фасади кон плоштадот и околните улици, статус на културно добро од регионално значење. И можеби најважниот детал: во моментот на пожарот зградата била празна. Иселена, во процес на реконструкција, со планови за голема обнова вредна над 750 милиони рубли.

Степенот на сложеност на интервенцијата прво е кренат на втор, а во 21.12 часот и на трет. Во првите часови на терен имало 125 луѓе и 25 возила, а подоцна групата пораснала на 165 луѓе и 37 единици техника. Стравот дека огнот ќе се префрли на околните објекти на крајот се оствари: пламенот премина на покривот на соседната зграда и таму изгоре покривна конструкција на околу 250 квадратни метри. Десет лица се превентивно евакуирани, меѓу нив и гости од хотелот во соседната зграда. Засега нема информации за повредени.

Пожарот е локализиран на 2 октомври во 00.40 часот, а отворениот пламен е изгаснат во 01.45. Исакиевскиот плоштад речиси целосно беше затворен за сообраќај, околните улици беа закрчени, а дел од тролејбуските линии беа пренасочени. Обвинителството на Адмиралтејскиот округ го стави под надзор утврдувањето на причината, Истражниот комитет на Русија почна предистражна проверка, а точната причина треба да ја покаже противпожарното техничко вештачење.

Сега тајмингот. Пожарот избувна токму додека Владимир Путин учествуваше на пленарната седница на 23-тото годишно заседание на Меѓународниот дискусионен клуб „Валдај“. Путин не беше во Санкт Петербург. Неговото обраќање и разговорот со учесниците траеја речиси четири часа, а кога во 20.11 стигна пријавата за пожарот, дискусијата сè уште траеше. Една од најостриите пораки беше токму за можен директен напад врз Русија: „Ако дојде до директен напад врз Русија, на дневен ред неизбежно и моментално ќе се појави прашањето за употреба на сите видови оружје што ги имаме на располагање“, рече Путин, зборувајќи за евентуален напад врз Калининград или друг руски регион.

Засега нема ниту една информација што би укажувала на каква било врска меѓу пожарот и говорот. Двата настана само се совпаднаа во времето. Но сликата на историска палата во пламен, наспроти катедралата „Свети Исак“, додека претседателот зборува за „сите видови оружје“, ќе живее подолго од официјалниот извештај. А прашањето што на Балканот се поставува речиси по автоматизам, дали празна зграда пред скапа обнова може сама од себе да фати оган, ќе мора да почека на вештачењето.