Дињата кај нас има точно едно место – крај на ручекот, ладна, исечена на месечинки. И тоа е добро место. Проблемот е што сезоната ѝ завршува за некоја недела, а таа целото лето го одработи како десерт, никогаш како јадење.

Италијанците одамна ја пуштија на почеток од масата, со пршута. Шпанските кујни отидоа чекор понатаму – ја сечат толку тенко што станува карпачо, и ја третираат како сол и киселина, не како шеќер.

Зошто воопшто функционира

Зрелата диња има цврсто, сочно месо што трпи многу тенко сечење. Природната сладост се врзува со солено, водата ја прави свежа, а вкусот е доволно неутрален за да прими речиси кој било прелив. Тоа се четирите работи што ги бараш од основа за предјадење.

Чекорот што одлучува

Сечи со мандолина или со навистина остар нож. Дебелината е сè – на три милиметри е овошје, на еден е карпачо. И ако пушти многу сок, попивај го со хартиена салфета пред да сервираш. Влажната подлога го разредува преливот и целото јадење станува млако.

Со домати и бурата

Мала кантелупа од 700 до 900 грама, две бурати, два зрели домати за салата и еден кумато. Дињата исчисти ја од семки, излупи ја и исечи ја тенко. Доматите сечи ги на три до четири милиметри и наредувај ги наизменично со дињата, за да се смени бојата. Половина црвен кромид тенко исечен, 80 грама каламата маслинки, бурата во средина. Одгоре маслиново масло, сол, пипер, лист босилек и по желба неколку капки балсамико крем.

Со босилек и лимета

Најбрзата од четирите. Тенки парчиња диња наредени во концентрични кругови, врз нив тенко исечени свежи црвени и зелени пиперки (извади ги семките ако сакаш помалку лутина), листови босилек, ренде од лимета и сокот од неа непосредно пред сервирање. Маслиново масло, сол, пипер. Толку.

Со пршута, моцарела и рукола

Тука дињата е медена, не кантелупа. Сто и дваесет грами тенко сечена шпанска пршута, 125 грама свежа моцарела, 60 грама рукола, 30 грама пињоли. Пињолите припечи ги на сува тава две до три минути додека не станат златни – тоа е разликата меѓу ореов вкус и ништо. Пршутата наредувај ја во набори, не рамно, за да не се залепи за дињата. Рукола во средина, пињоли одгоре, масло, сол, пипер. Служи веднаш.

Со карабинеро и винегрет од црни маслинки

Најамбициозната. Четири карабинери, 40 грама црни маслинки без коскички, еден лимон, четвртина прачка ванила. На ракчињата извади им ги главите, излупи ги но остави го последното сегментче на опашката, извади го цревцето и брзо припечи ги на скара со малку масло. Маслинките исецкај ги ситно. Од лимонот земи ренде и тенки ленти кора, кои ќе ги обариш триесет секунди. Винегретот: пет лажици маслиново масло, сокот од лимонот, рендето, исецканите маслинки и семките од ванилата. Сол и пипер. Ракчињата врз карпачото, винегретот одгоре, потоа лентите кора и босилек.

Ванилата во солено јадење звучи погрешно додека не се проба. Таа не додава сладост – го отвора вкусот на ракчето и ја врзува дињата со маслинката, кои инаку немаат заедничка точка.