Кој барем еднаш чекал такси во Скопје во шпиц или платил повеќе отколку што пишувало на таксиметарот, знае дека секторот одамна е во хаос. Сега и самите таксисти го признаваат гласно: недостигаат возила, таксиметрите се диво штелувани, а низ градот се вози и без лиценци.

Здружението на таксисти од Скопје набројува цела низа системски проблеми – освен недостигот на возила и манипулираните таксиметри, тука се и нелегалните возачи, работниците на црно и ограничувањето за возила постари од 2011 година воведено без разумен преоден период. „Условите се врзани за еколошки стандард Евро 4, но начинот на кој се води сега не е добар”, изјави претседателот на здружението Сашо Рајчановски.

Барањата кон власта се конкретни: построга инспекциска контрола, измени на законите за превоз што ќе бараат лиценцирани возачи во редовен работен однос, и проверки на таксикомпаниите од финансиските органи. Со други зборови, ред таму каде што со години владее самоволие – а сметката за тоа самоволие ја плаќа патникот, со скапа возење и сомнителна безбедност.

Таксистите најавуваат и протести во наредните денови. И тука е парадоксот што балканскиот граѓанин одлично го познава: оние што се во хаосот сега бараат држава да воведе ред, додека истата таа држава со години гледала настрана додека проблемот растел. Прашањето не е дали Скопје има проблем со таксите – тоа сите го знаат – туку зошто требало работите да стигнат до протест за некој во институциите воопшто да слушне.