Проектот за кој Скопје слуша со години конечно добива датум. Градоначалникот Орце Ѓорѓиевски соопшти дека брзиот автобуски превоз (БРТ) влегува во фаза на реализација, откако со тимот на ЕБОР ги финализирале последните координации. По години планови, макети и најави, БРТ навидум тргнува од хартија кон улица.

Од Општината ветуваат дека проектот нема да се реализира на сметка на постојното булеварско зеленило – напротив, најавуваат нови зелени површини. БРТ е претставен само како дел од поширока визија: градски воз, набавка на 100 нови автобуси преку Владата и оптимизација на автобуската мрежа. На хартија – модерен, побрз, поеколошки јавен превоз за главниот град.

Ветувањето звучи добро, но Скопје има долга меморија за проекти што „влегуваат во фаза на реализација” и таму остануваат со години. Колку пати досега слушнавме за модерен јавен превоз, за метро, за брзи линии – а на крајот граѓанинот пак чека автобус што доцни на жештина од 38 степени? БРТ не е нов проект; тој се провлекува низ мандати. Затоа скептицизмот не е цинизам, туку искуство.

Финализираните координации со ЕБОР се позитивен сигнал – меѓународна банка не потпишува лесно. Но вистинскиот тест не е прес-конференцијата, туку првата линија што ќе тргне и првиот патник што ќе стигне побрзо на работа. Дотогаш, БРТ останува ветување. Скопје не му треба уште една убава најава – му треба автобус што доаѓа навреме. Кога ќе го видиме тоа, тогаш ќе славиме.