Возот тргнал по редовна релација меѓу Руан и Кан, во северна Франција. Во него 180 патници. Потоа удрил во нешто – и излегол од шините.

Бројот на повредени прво беше околу дваесет, па порасна на 44. Еден човек е во критична состојба и е евакуиран со хеликоптер, соопшти локалниот префект Жан-Беноа Албертини. На местото на несреќата работеа 140 пожарникари, а на жителите им беше препорачано да ја избегнуваат зоната.

Што точно удрил возот – сѐ уште не е познато. Полицијата го опишува како неидентификуван предмет. Државниот железнички оператор СНЦФ соопшти дека истрагата за причината е во тек. Министерот за транспорт Филип Табаро потврди дека композицијата излегла од шините кај градот Клеон.

Сообраќајот на линиите Руан-Кан и Кан-Авр е прекинат, а патниците се пренасочени на автобуси.

Франција има една од најгусто испреплетените и најмодернизирани железнички мрежи во Европа – истата земја што ги вози своите брзи возови над 300 километри на час. И сепак, доволно е еден предмет на шините за 180 луѓе да се најдат во превртена композиција. Ако тоа се случува таму каде што буџетот за инфраструктура не е тема за расправа, што кажува тоа за железниците каде што е?

Одговорот на тоа прашање го знае секој што некогаш чекал воз на Балканот. Разликата не е во тоа што кај нас нема несреќи – разликата е во тоа колку брзо стигнуваат 140 пожарникари, и колку брзо некој излегува пред камери со име, презиме и функција да каже што се случило.