Собранието доби нов министер без ресор – Зулфикар Зејнула, претседател на Демократската партија на Турците во Македонија. За неговиот избор гласаа 67 пратеници, 13 беа против. Но поинтересно од бројот на гласови е сметката што стои зад него: со овој потег, коалицијата предводена од ВМРО-ДПМНЕ доби уште еден пратеник во својот табор.

Демократската партија на Турците досега беше дел од Европскиот фронт, во коалиција со ДУИ. Сега преминува кон власта. Со тоа мнозинството предводено од ВМРО-ДПМНЕ, без партнерите ВЛЕН и ЗНАМ, се зголемува на 59 пратеници. Секој што сака да разбере зошто еден министер без ресор е важен – нека ја погледне аритметиката во Собранието, а не описот на работното место.

Не случајно изборот на Зејнула беше одвоен од претходната реконструкција на Владата. Да беше вклучен во истиот пакет, ќе се надминеше уставниот лимит за промена на најмногу една третина од министрите, што би ја активирало постапката за избор на сосема нова влада. Значи, тука ништо не е случајно – секој чекор е пресметан до последната одредба од Уставот.

Опозицијата не се воздржа од сарказам. Пратениците иронично прашуваа дали новиот министер е задолжен „за ајран, боза или за Бадентер”, инсинуирајќи дека функцијата постои не за да претставува некого, туку за да го зацврсти мнозинството. Оливер Спасовски побара јасни детали за обврските и портфолиото на новиот член на Владата – детали што, како по правило, ги нема.

Премиерот Христијан Мицкоски го брани изборот со фразата дека „институциите треба да ги водат луѓе што имаат одговорност и капацитет да ги решаваат проблемите на граѓаните”. Убава реченица за секоја прилика. Но прашањето што виси над цела оваа реконструкција е дали граѓаните добија подобра влада – или само еден пратеник ја смени страната на кантарот.