Има слики што кажуваат повеќе од сите говори за еднаквост. Среде екстремен топлотен бран што ја пече Европа, Европската комисија ја исклучи климатизацијата во зградата Берлемон во Брисел – но само на катовите од први до седми. Погорните катови, токму онаму каде се канцелариите на комесарите, останаа разладени. Феудализам со клима-уред, би рекол некој.

Тринаесеткатната зграда е дом на претседателката Урсула фон дер Лајен, 26 комесари и околу 3.000 вработени. Овие последните добија СМС-порака: „Поради екстремни временски услови, климатизацијата од први до седми кат се исклучува до крајот на денот.” Еден вработен пријавил температура од 25,7 степени дури и со вклучена клима на осмиот кат. Замислете како било на оние без неа.

Реакциите не доцнеа. Анонимни службеници ја опишаа одлуката како „феудализам”, друг ја нарече „срамна”. И навистина – институцијата што постојано држи лекции за солидарност, праведна транзиција и грижа за најранливите, при првиот вистински топлотен удар реши кој ќе се поти, а кој не. По катови. По хиерархија.

Топлотниот бран попатно ја разоткри и поголемата вистина за Европа – само една петтина од домаќинствата имаат клима-уред, а во Белгија дури и возовите останаа без разладување, па дел од линиите беа откажани. Но додека обичните Европјани се борат со жештината како знаат, сликата од Берлемон останува како симбол: и во најнапредната бирократија на светот, удобноста сепак тече нагоре. Дали кај нас би било поинаку? Веројатно не – но барем не се преправаме дека сме подобри.